Астанада BaiQymyz-2026 халықаралық гастрономиялық фестивалі басталды. «Қазанат» ипподромында өтіп жатқан ауқымды шарада қазақстандықтар мен шетелдік қонақтар қымыздың түр-түрінен дәм татып, қазақтың ұлттық тағамдары, салт-дәстүрі, этноауылдары, ат спорты мен мәдени бағдарламаларымен танысып жатыр, деп хабарлайды kznews.kz.

Фестиваль аясында келушілер этноауылдарды аралап, қолөнер көрмелерін тамашалап, ұлттық тағамдардан дәм татып, ат спорты жарыстары мен ұлттық ойындарды көре алады. Ұйымдастырушылардың айтуынша, мұндай іс-шаралар Қазақстанның мәдениеті мен қонақжайлығын халықаралық деңгейде насихаттауға мүмкіндік береді.

Шетелдік меймандардың ерекше қызығушылығын қымыз бен басқа да ұлттық тағамдар, сондай-ақ ат спорты сайыстары тудырған.

АҚШ-тан келген Уайт пен Томастың айтуынша, олар Қазақстанға қазақ мәдениетімен жақынырақ танысу үшін арнайы келген.

«Біз Америка Құрама Штаттарынан келдік. Қымыз фестиваліне қазақ мәдениетімен жақынырақ танысу үшін арнайы келдік. Қазақстанда тұрып, адамдарға көмектесу бізге ұнайды. Осы жерде көптеген тамаша адамдармен танысып, қазақ мәдениеті туралы күн сайын жаңа дүниелер біліп жатырмыз. Ең бастысы – қымызды жақсы көріп қалдық, енді оның мүмкіндігінше көп түрінен дәм татқымыз келеді», – деді олар.

Шетелдік қонақтардың пікірінше, BaiQymyz-2026 фестивалі Қазақстанды ұлттық дәстүрі, музыкасы, спорты және халқының қонақжайлығы арқылы жаңа қырынан танытуға ықпал етеді.

Еске салайық, BaiQymyz-2026 халықаралық гастрономиялық фестивалі 11-12 шілде күндері Астанадағы «Қазанат» ипподромында өтіп жатыр. Бағдарламаға ұлттық тағамдардың көрмесі мен дегустациясы, мәдени және спорттық іс-шаралар, ат спорты шоулары, отбасылық демалыс аймақтары және қазақстандық өнер жұлдыздарының концерттері енгізілген.