Қаулы 13 шілдеден бастап күшіне енеді.

2026 жылғы 26 маусымдағы қаулымен ҚР Үкіметі Қазақстан Республикасының Мемлекеттік туын, Мемлекеттік елтаңбасын және Мемлекеттік әнұранын пайдалану (орнату, орналастыру) қағидаларына өзгерістер енгізді, деп хабарлайды Total.kz тілшісі.

Өзгерістер мемлекеттік рәміздерді пайдалану ережелерін нақтылайды және даулы тұстарды анықтауға бағытталған. Мәселен, азаматтар патриоттық сезімдерін, қазақстандық бірегейлікті білдіру және елдің жетістіктерін қолдау мақсатында туды ғимараттарда (тұрғын үйлер мен тұрғын емес үй-жайларда), оның ішінде балкондарда (45 градус бұрышпен) және салтанатты іс-шаралар өткізілетін орындарда пайдалана алады (орната алады, орналастыра алады).

Бұл ретте Мемлекеттік туды тұрғын үйлерде пайдалану (орнату, орналастыру) кемінде үш метр биіктікте орналастыру шартымен рұқсат етіледі, алайда қараңғы уақытта мемлекеттік рәміздерді жарықтандыру міндетті емес. Заңды және жеке тұлғалардың туды орнатуына (орналастыруына) мынадай жағдайларда жол беріледі:

  • іргелес аумақта орналасқан жеке ту ұстағышта;
  • жер, еден, су және өзге де беттермен жанаспау шартымен;
  • тігінен орналастыру шартымен, бұл ретте ұлттық ою-өрнек матаның жоғарғы бөлігінде орналасуы тиіс;
  • жеке және заңды тұлғалар өткізетін мәдени, спорттық, қоғамдық және өзге де іс-шаралар барысында коммерциялық мақсаттарды болдырмау шартымен;
  • оның қадір-қасиеті мен символдық мәнін төмендететін зақымдану, тозу, жамау, тесілу, ластану, өңінің өшуі, мыжылу немесе өзге де ақаулардың болмауы шартымен;
  • Қазақстан Республикасының мемлекеттік рәміздер туралы заңнамасының талаптарын сақтай отырып, жеке және заңды тұлғаларға тиесілі көлік құралдарының салондары ішінде пайдалану шартымен.

Мемлекеттік рәміздердің бейнесі спорттық форма мен жабдықта рұқсат етіледі.

Мемлекеттік рәміздерді мемлекеттік органдардың веб-сайттарында орналастыру кезінде мынадай талаптар сақталуы тиіс:

  • мемлекеттік рәміздердің бейнелерін бір деңгейде орналастыру;
  • кезектілік: Мемлекеттік ту, Мемлекеттік елтаңба, Мемлекеттік әнұран.

Маңызды нақтылау: Қазақстан Республикасының мемлекеттік рәміздеріне арналған стенд үшін бөлінген үй-жайлар эстетикалық безендірілуі және шаруашылық-тұрмыстық бөлмелерден, өткел мен киім ілгіштен алыс орналасуы тиіс.

Өзгерістерде сондай-ақ Мемлекеттік ту, оның мөлшеріне қарамастан, ұлттық стандартқа сәйкес келуі тиіс және оны жеке және заңды тұлғалар қорлау заты ретінде пайдалана алмайтыны атап өтілген.

Қағидалармен Мемлекеттік туды қасақана зақымдау, жою, өртеу, жырту, жерге тастау, мақсатсыз пайдалану, сондай-ақ оның мемлекеттік рәміз ретіндегі қадір-қасиеті мен мәнін төмендететін өзге де әрекеттер жасауға жол берілмейді. Мемлекеттік туды жарнамалық мақсатта, сондай-ақ киім, төсек жабдықтары, перде, дастархан, кілемше және өзге де жамылғылар ретінде пайдалануға болмайды.

Қаулы 13 шілдеден бастап күшіне енеді.