Президент 2030 жылға қарай Қазақстанда электр энергиясы тапшылығы болатынын атап өтті.

Қазақстан Президенті Қасым-Жомарт Тоқаев халыққа Жолдауында үкімет пен «Самұрық-Қазынаға» қауіпсіз және экологиялық атом энергетикасының мүмкіндігін зерделеуді тапсырды, деп хабарлайды Total.kz тілшісі.

«2030 жылға қарай Қазақстанда электр энергиясы тапшылығы болады. Әлемдік тәжірибе ең оңтайлы жолды – бейбіт атомды ұсынады. Мәселе күрделі, сондықтан оны шешуге барынша ұтымды, жорамалдар мен эмоциясыз қарау керек. Бір жыл ішінде үкімет және «Самұрық-Қазына» Қазақстанда қауіпсіз және экологиялық атом энергетикасын дамыту мүмкіндігін зерделеуі тиіс», – деді Тоқаев.

Президент бұл мәселені инженерлік істі дамыту, елімізде жаңа буын білікті атом инженерлерін қалыптастыру тұрғысынан да қарастыру қажеттігін атап өтті.

«Жасыл сутегін өндіру, жалпы сутегі энергетикасы да перспективалы бағыт болып табылады. Үкіметке осы мәселе бойынша да ұсыныстар әзірлеу тапсырылады», – деп қосты Тоқаев.