Шетелдіктердің Қазақстанда болу мерзімі ұзартылды

Шетел азаматтарының Қазақстанда болу мерзімі пандемия жағдайына байланысты ұзартылды, деп хабарлады брифингте ҚР ІІМ Көші-қон қызметі комитеті төрағасының орынбасары Сабыржан Сейтжанов, деп хабарлайды Total.kz тілшісі.

«Коронавирус инфекциясының пандемиясы Қазақстанда жүрген шетелдіктердің өмірі мен жоспарларына өз түзетулерін енгізуде. Тікелей көлік қатынасының болмауы, транзиттік жол жүру үшін шекаралардың жабылуы, әуе билеттерінің қымбаттығы – осы факторлардың бәрі заңды шетелдіктердің көпшілігіне белгіленген мерзімде Қазақстаннан шығуға мүмкіндік бермей отыр», – деп түсіндірді Сейтжанов.

Қалыптасқан жағдайды ескере отырып, Ведомствоаралық комиссия елде уақытша жүрген шетелдіктердің мәртебесін заңдастыруға және Қазақстан заңнамасын бұзуға жол бермеуге мүмкіндік беретін шешім қабылдады.

«Негізгі назар отбасымен қосылу үшін келген шетелдіктерге, құжаттарының қолданылу мерзімі өткен азаматтарға, сондай-ақ еңбек иммигранттарына аударылды», – деп нақтылады комитет төрағасының орынбасары.

Оның айтуынша, жол жүру құжаттарының, шетелдіктің тұруға ықтиярхатының, Қазақстан Республикасы визаларының, ҚР-да уақытша болуға рұқсаттардың қолданылу мерзімі 2021 жылғы 5 маусымға дейін өтіп кеткен немесе аяқталатын шетелдіктер мен азаматтығы жоқ адамдардың әкімшілік жауапкершілікке тартылмай шығуына рұқсат етілген.

«Еңбек қызметін жүзеге асыруға рұқсаты немесе жергілікті атқарушы орган берген өз бетінше жұмысқа орналасу үшін біліктілікке сәйкестігі туралы анықтамасы бар шетелдіктерге 2021 жылғы 5 маусымға дейін болу мерзімдері (визалар, уақытша тұруға рұқсаттар) ұзартылады. Виза, уақытша тұруға рұқсат шетелдіктің немесе азаматтығы жоқ адамның мәлімделген келу мақсатына қойылатын талаптарды есепке алмай беріледі», – деп хабарлады Сейтжанов.

Брифингте еңбек иммигрантына рұқсат беру-ұзарту, қайта ресімдеу туралы өтініш білдіргендерге ресімдеу ҚР «Халықтың көші-қоны туралы» заңының 43-1-бабы 2-тармағының талаптарын есепке алмай жүзеге асырылатынын қосты.

«Осыған байланысты Қазақстан Республикасында жүрген, рұқсат құжаттарының мерзімі өтіп кеткен немесе аяқталатын шетел азаматтары құзыретті органдарда өздерінің құқықтық мәртебесін уақтылы реттеу үшін көші-қон қызметіне жүгінуі қажет. 2021 жылғы 1 қаңтардан 5 маусымға дейінгі кезеңде құқықтық мәртебесін заңды негізде реттемеген шетелдіктер құқықтық жауапкершіліктен босатылмайтынын ескертеміз», – деп қорытындылады Сабыржан Сейтжанов.