Нидерланд астанасындағы ірі мешіт вандализм әрекетіне ұшырады.

Нидерланд астанасындағы ірі мешіт өткен жылдан бері екінші рет вандализм әрекетіне ұшырады. Мешіт түрік діни ғимаратының құрметіне «Айя София» деп аталады және Амстердамда орналасқан, деп хабарлайды Daily Sabah.

Өткен демалыс күндері оның қауым мүшелері таңертең сындырылған әйнектер мен вандалдың ғимаратқа зақым келтіру үшін пайдаланған сыра бөтелкесін тапты.

«Біз қауіпсіздік күштері мен саясаткерлерден осындай шабуылдарға қарсы шұғыл шаралар қабылдауды күтеміз», – деді мешіт өкілі Гази Чирик.

2020 жылдың желтоқсанында бетперде киген белгісіз біреу кешкі намаздан кейін осы мешіттің терезелеріне бірнеше тас лақтырып, содан кейін жасырынып кеткен болатын.

Соңғы жылдары Нидерландта оңшыл радикалдардың агрессивті риторикасының әсерінен мешіттерге қарсы вандализм әрекеттері жиілеп, мұсылман қауымы мемлекеттің исламофобиялық экстремизмге қарсы күрес жөніндегі күш-жігерін жеткіліксіз деп санайды.