Шымкентте есірткі таратушы курьерлер ұсталды

Шымкентте есірткі таратушы кезекті курьерлер ұсталды, деп хабарлайды Total.kz.

2 сәуірде Шымкент қалалық Полиция департаментінің есірткі қылмысына қарсы күрес басқармасының қызметкерлері синтетикалық есірткі заттарын таратумен айналысқан төрт курьер-салымшыны ұстады: бір әйел, бұрын қылмыстық жауапкершілікке тартылған бір ер адам және азаматтық некеде тұрған отбасылық жұп. Аталған адамдар әлеуметтік желілердің бірінде құрылған чаттан құқыққа қайшы әрекеттерге байланысты тапсырмалар алған.

Олар синтетикалық есірткі заттарын қала аумағындағы белгілі бір жерлерге салған. Әрбір көрсетілген қызмет үшін курьерлер электронды төлем жүйелері арқылы белгілі бір ақша сомасын алған.

Тексеру барысында алдын ала дайындалған, полиэтилен сым қабықшаға оралған есірткі заттары – барлығы 69 дана анықталып, алынды. Олардың көпшілігі жасырын орындарда сақталған. Қазіргі уақытта аталған азаматтардың басқа да осыған ұқсас қылмыстарға қатыстылығы тексерілуде.