Закирьяновтың кабинетіндегі суретке Экология министрлігі тарапынан оғаш реакция

Қазақстанның экология, геология және табиғи ресурстар министрлігі қазақстандықтардың Қызыл кітапқа енген жануарлардың терілері фонындағы суретіне реакция білдірді, деп хабарлайды Total.kz тілшісі.

Еске салайық, қазақстандық кәсіби боксшы Жанқош Тұраров Instagram әлеуметтік желісінде Спорт және туризм академиясының басшысы Қайрат Закирьяновпен бірге сурет жариялады. Сурет оқу орны басшысының кабинетінде жабайы жануарлардың (қар барысы, сілеусін, арыстан) терілері мен тұлыптары фонында түсірілген. Бұл туралы Орман шаруашылығы және жануарлар дүниесі комитетінің бұрынғы баспасөз хатшысы Сәкен Ділдахмет жариялағаннан кейін белгілі болды. Пайдаланушылардың реакциясы ұзақ күттірмеді: салалық министрліктен тиісті тексеру жүргізіп, оның қорытындысы бойынша Спорт және туризм академиясының басшысына қатысты шара қолдануды сұрады.

«Бізді мұндай суреттер ашуландырды. Бұл жол берілмейді»,– деп жазды Facebook әлеуметтік желісінде Қазақстанның экология, геология және табиғи ресурстар министрлігінің баспасөз хатшысы Самал Ибраева.

Ол суреттерде қар барысының, сілеусіннің терілері мен арыстанның тұлыпы бейнеленгеніне назар аударып, суреттерде барыс терісінің болу фактісі бойынша министрліктің Орман шаруашылығы және жануарлар дүниесі комитетінің Алматы облысы бойынша аумақтық инспекциясы жағдайды тергеу және тиісті шаралар қабылдау үшін құқық қорғау органдарына жүгінетінін қосты, өйткені бұл жануар Қазақстанның Қызыл кітабына енгізілген және оған аң аулауға қатаң тыйым салынған.

«Қазақстанда арыстандар мекендемейді. Сондықтан суреттердің елімізде ме, әлде шетелде ме түсірілгенін анықтау керек», – деп атап өтті ол өз хабарламасында. (Айта кету керек, бұл сөздерді кейін ол өз жазбасынан алып тастады).

Министрлік баспасөз хатшысының пікірі әлеуметтік желі қолданушылары тарапынан келесідей реакция тудырды.

«Өте абсурдты пікірлер! Самал Ибраева, сурет оның кабинетінде – Алматы қаласында түсірілген, шетелде емес. Иә, арыстандар мекендемейді, бірақ оларды басқа елдерден әкелуге болады. Заң бойынша жабайы жануарлардың тұлыбын, егер оған құжаттары болса, пайдалануға болады (НҚА-ны оқыңыз). Ең бастысы, сіздердің бүгінгі міндеттеріңіз – барлық ұлттық парктерді жеке қолға беру, қорық аймақтарында жолдар салу, көктемде жануарларға аң аулауды ашу және т.б. Флора мен фаунаны осылай қорғайсыздар және сақтайсыздар. Қандай пафосты сөздер айтасыздар!», – деп жазды Сәкен Ділдахмет.

Кейін Самал Ибраева қазақстандықтардың жарияланым суреттері Экология министрлігінің Алматы облысы инспекциясымен зерттеліп, материалдар Алматы қалалық полиция департаментіне жіберілгені туралы ақпарат жариялады.

«Жарияланымдар Экология министрлігінің Алматы облысы инспекциясымен зерттеліп, материалдар 2021 жылғы 20 қаңтардағы № 03-10/86 хатпен ҚР ҚК 339-бабында көзделген сирек кездесетін және жойылып кету қаупі төнген, сондай-ақ пайдалануға тыйым салынған жануарлар түрлерімен, олардың бөліктерімен немесе дериваттарымен заңсыз айналысу белгілері бойынша Алматы қалалық полиция департаментіне жіберілді», – деп түсіндірді Самал Ибраева.

Өз кезегінде, суретте түсірілген академик Қайрат Закирьянов журналистерге өз олжаларының шығу тегі туралы айтып, бұл қар барысының терісі емес екеніне сендіруге асықты, ал ашуланған қазақстандықтарға «жай көрінгенін» айтты.

«Бұл қар барысы емес, бұл сілеусін және мен атқан арыстан. Сілеусіннің терісін маған Шығыс Қазақстанда сыйға тартты, ал аққуларды, есімде жоқ, тарихпен айналысқаным үшін сыйға тартты. Сондықтан мұнда тыйым салынған ештеңе жоқ. Сілеусін бізде Қызыл кітапқа енбеген. Бұл барыс емес, сіздерге жай көрінген», – деп түсіндірді журналистерге Қайрат Закирьянов.

Кейінірек, басқа БАҚ-қа Закирьянов оның кабинетіндегі барыс – макет екенін мәлімдеді. Оның үстіне, бұл оған емес, Спорт және туризм академиясына тиесілі және оқу орнының ақшасына талапкерлерді тарту үшін сатып алынған.