Лукашенко 24 маусымда Ресей астанасына келетінін растады.

Ресей Президенті Владимир Путин Беларусь көшбасшысы Александр Лукашенкомен телефон арқылы сөйлесті, деп хабарлайды «РИА Новости».

Кремль баспасөз қызметінің мәліметінше, тараптар Мәскеудегі Жеңіс шеруі, коронавирус жағдайы және Ресей Сыртқы істер министрі Сергей Лавровтың Минскіге сапары барысында 19 маусымда қол қою жоспарланған визалық келісімді талқылады.

Сондай-ақ Лукашенко 24 маусымда Ресей астанасына келетінін растады.

Ал Беларусь президентінің баспасөз хатшысының айтуынша, «Белгазпромбанк» жағдайына қатысты мәселелер көтерілмеген.

«Белгазпромбанктің» бұрынғы басшысы және қолданыстағы көшбасшының президенттікке негізгі қарсыластарының бірі Виктор Бабарико 18 маусымда ұсталып, қылмыстық схема ұйымдастырды деп айыпталды. Бұған дейін Кремльдің ресми өкілі Дмитрий Песков болған оқиғаны Минскінің ішкі ісі деп атаған еді.

Беларусьтегі президенттік сайлау 9 тамызға жоспарланған.