Лукашенконың айтуынша, бұрынғы премьер-министр «бизнеспен айналысқысы келеді».

Беларусь Президенті Александр Лукашенко Мемлекеттік әскери-өнеркәсіп комитетінің төрағасы Роман Головченконы республиканың жаңа премьері етіп тағайындады, деп хабарлайды БелТА.

«Беларусь Президенті Александр Лукашенко премьер-министр етіп Роман Головченконы тағайындады, ол осы уақытқа дейін Мемлекеттік әскери-өнеркәсіп комитетінің төрағасы қызметін атқарған», – делінген хабарламада.

Лукашенко үкімет басшысы қызметін атқарған Сергей Румасқа ешқандай талабы жоқ екенін, бірақ оның бизнеспен айналысу ниетін құптайтынын айтты.

«Үлкен талаптар жоқ, бірақ адам бизнеспен айналысқысы келеді. Мен құптаймын», – деді президент.

Сондай-ақ ол Николай Снопковты бірінші вице-премьер етіп тағайындады. Бұған дейін Снопков Беларусьтің Қытайдағы елшісі болып жұмыс істеген.

Өз кезегінде бұрын премьер-министрдің бірінші орынбасары қызметін атқарған Дмитрий Крутой президент әкімшілігі басшысының орынбасары болып тағайындалды. БелТА мәліметінше, президент әкімшілігі басшысының бұрынғы орынбасары Валерий Бельский экономика және банк қызметі мәселелерін қадағалайтын президент көмекшісі болады.

Қаржы министрлігінің жаңа басшысы болып Юрий Селиверстов тағайындалды. Бұған дейін Селиверстов ведомство басшысының бірінші орынбасары қызметін атқарған.

Лукашенко сондай-ақ Дмитрий Пантусты Беларусь Мемлекеттік әскери-өнеркәсіп комитетінің төрағасы етіп тағайындады. Ол осы уақытқа дейін Мемлекеттік әскери-өнеркәсіп комитеті төрағасының орынбасары болған.

Тұрғын үй-коммуналдық шаруашылық министрі болып Андрей Хмель, ал Дмитрий Матусевич Мемлекеттік мүлік комитетінің басшысы болып тағайындалды. Петр Пархомчик өнеркәсіп министрі, ал Игорь Луцкий ақпарат министрі болып тағайындалды. Осы тағайындауға дейін Пархомчик «БелАЗ» ААҚ-ын басқарған, Луцкий «Столичное телевидение» ЖАҚ бас директоры қызметін атқарған.