Түрік лирасы рекордтық минимумды жаңартты.

Түркия президенті Тайип Ердоған ұлттық валюта бағамының рекордтық құлдырауы аясында елдің Орталық банк басшысы Мұрат Ұйсалды қызметінен босатты. Тиісті жарлық сенбі күні үкіметтің ресми Resmi Gazete бюллетенінде жарияланды, деп хабарлайды «РИА Новости».

«Республика Орталық банкінің басшысы Мұрат Ұйсал заңнамаға сәйкес атқарып отырған лауазымынан босатылды», – делінген хабарламада.

Құжатта атап өтілгендей, «осы сәттен бастап Орталық банк басшысы лауазымына Наджи Ағбал тағайындалды», ол бұған дейін ел президенті әкімшілігінің стратегиялық және бюджеттік басқармасының басшысы, сондай-ақ Түркияның қаржы министрі (2015-2018 жылдары) қызметтерін атқарған.

Түрік валютасының бағамы сейсенбі күні рекордтық минимумды жаңартып, 1 доллар үшін 8,49 лираға дейін төмендеді, бұл 30 қазанда тіркелген алдыңғы минимумнан (1 доллар үшін 8,34 лира) асып түсті.