Жапаров конституциялық реформа жүргізу ниеті туралы айтты.

Қырғызстанның президент міндетін атқарушы, премьер-министрі Садыр Жапаров үлкен баспасөз мәслихатын өткізді, деп хабарлайды «МИР 24».

Баспасөз мәслихатының тікелей эфирі мемлекеттік арналардың бірінде өтті. Сұрақтардың көпшілігі елде жүргізіліп жатқан сыбайлас жемқорлыққа қарсы күрес және бюджет тапшылығын толтыру әдістеріне қатысты болды.

Садыр Жапаров президенттік институтты күшейтуге бағытталған және парламент депутаттарын сайлаудың партиялық жүйесінен бірмандатты жүйеге көшуді көздейтін конституциялық реформа жүргізу ниеті туралы сұраққа жауап берді.

«Конституциялық реформа – халықтың қалауы. Барлық өзгерістерді кейін парламент бекітеді. Парламент сайлауына келетін болсақ, бұл да халықтың шешімі. Бірақ қазір 35 депутаттың бірмандатты жүйе бойынша, ал 55-нің партиялық тізімдер бойынша өтуі туралы ойлар бар. Демек, бізде 120 емес, 90 депутат болады. Диктатура мүлдем болмайды – қырғыздар жібермейді. Барлық революциялар сондықтан болды», – деді Садыр Жапаров.

Садыр Жапаров елді бір айдан сәл аз уақыт басқарып келеді. Ол билікке Қырғызстанда 4 қазанда парламенттік сайлау жаппай бұзушылықтармен өткеннен кейін келді. Бұл халық толқуларына және дауыс беру қорытындыларының жойылуына әкелді. Кейін парламент көпшілік дауыспен Садыр Жапаровты елдің премьер-министрі етіп бекітті. Ал экс-президент Сооронбай Жээнбеков өкілеттігін тапсырғаннан және парламент спикері оларды өз мойнына алудан бас тартқаннан кейін, мемлекет басшысының функциялары премьер-министр Жапаровқа өтті.